Odolean neraman / Joan Mari Irigoien

Odolean neraman dio nobelaren protagonistak bere ogibide eta pasio izan denari buruz. Izan ere, Eneko Ortegak umetatik izan zuen futbolerako grina. Jaio aurretik ere bai kasik, futbolzale itsuak baitzituen bai gurasoak bai amona. Zaletasunarekin batera etorri zitzaion dohaina, izugarrizko abilezia ageri baitzuen baloi bat oin artean hartuz gero. Auzoko taldetik laster egingo du jauzi Errealera, eta beranduago baita Barçara ere. Arrakastak dirua eta ospea ekarriko dizkio Enekori, eta diru nahiz ospe horren atzetik etorriko dira txoratze eta gehiegikeriak, lorez lore, drogaz droga. Gure gizartearen erretratu eta kritika bat egin du Joan Mari Irigoienek eleberri honetan, futbolaren mundua oinarritzat hartuta: komunikabideen funsgabekeria, harremanen axalkeria, famaren lilura hutsala... horiek denak deskubrituko ditu irakurleak nobelan barrena, elkarrizketa ugarien eta ekintza etengabearen bitartez; futbolariak bere bizi-esperientzia lehen pertsonan azaltzeak ematen duen arintasun eta hurbiltasunaz, idazleak kontakizunari erantsi dion estilo bizi eta umoretsuaz.